政壇：證券界團拜食正8字
過完聖誕節同新年，話咁快下個月又到農曆新年。聽聞證券界已開始密鑼緊鼓籌備今年嘅新春團拜，今年會有啲特別，將提早到大年初八（二月二十六號）就舉行，佢哋唔係貪好意頭要擇好日，而係要遷就班政協三月初上京開會。
以往證券界團拜多數都喺正月十幾甚至二十幾（日）至舉行，今年由於到二月下旬（二月十九日係大年初一）至過農曆年，三月初班證券界大佬又要上京開兩會，所以要提早團拜。其實咁咪更有過節氣氛。好彩港交所又配合，當日證券界可訂到港交所展覽廳做團拜。
今年春茗係證券界九會聯合主辦，包括網上經紀協會、證券業協會、貴金屬同業協會、股票分析師協會、證券學會、中資證券業協會、證券商協會、證券及期貨專業總會同中國金融協會。
由於係業界大事，九會今日將開大會商討細節。
