政壇：星爺發火反助泛民拉布
泛民喺今個立法年度發起「不合作運動」，連帶財務委員會轄下人事編制同工務兩個小組委員會都面對「拉布」。好似尋日人事編制小組開會，就民政事務局為監察西九文化區發展申請保留兩個編外職位，就惹嚟泛民同建制爭拗，間接助長泛民「拉布」遺禍。
吳亮星
班議員本來傾緊職位開幾耐，點知劉慧卿話高鐵影響西九發展，搞到好多工程延期落成，金融界「星爺」吳亮星就抵唔住頸，反駁泛民呢頭話工程延期落成，嗰頭就搞不合作運動，增加公帑開支，如果繼續咁樣拖慢撥款審議，開支一路增加，點樣有競爭力？佢又形容泛民厚顏無恥，乜都反對，仲要求局方回應幾多開支係因為不合作運動而導致。
工黨何秀蘭加入戰團，反駁星爺話西九戲曲中心超支同「拉布」無關，叫佢做吓功課。人民力量陳志全都叫星爺唔好借題發揮，又話唔係所有撥款申請都係十萬火急，所以唔好恐嚇市民。星爺回應話任何問題都可以問一大串，要解決問題先係為民眾，問政府有乜方法可以令撥款順利通過。
最後會議都係未能通過撥款，要月底加開會議再傾，納稅人金錢就咁無辜倒落鹹水海。
