管制系統多甩漏 航空安全令人憂
舊年可以話係航空界當黑嘅一年，繼馬航客機事故及台灣澎湖空難之後，年尾又發生亞航客機墜毀慘劇，令人不寒而慄。所以話，航空安全唔講得笑o架，稍有差遲就會釀成奇災巨禍，偏偏港府烏龍百出，搞到航空安全千瘡百孔，唔到你唔擔心。
本報年前獨家踢爆民航處新總部大花筒及新空管系統閒置浪費等多宗罪，引起全城嘩然，其後審計署介入調查，證實本報報道真確無誤，立法會帳目委員會尋日就新空管系統問題開會討論添。本來呢，民航處耗費十五億元更換新空管系統，延誤三年依然啟用無期，民航高官應該感到羞恥至係o架，點知民航處處長羅崇文唔知個醜字點寫，居然死撐話因為需要修改標書以符合國際民航要求，所以新系統至會延誤喎。更離譜嘅係，佢自爆民航處早前向立法會匯報新系統可以喺今年啟用，係過於樂觀喎，根據最新評估，新系統需要延至明年上半年至可以投入運作咁話。
有冇搞錯吖，如果唔係有實際需要，空管系統都唔會更換喇，家陣新系統啟用一拖再拖，安全豈不是毫無保障？萬一出事咯喎，邊個負責吖？正如有議員話齋，民航處空管系統過時，不符當今航空科技要求，民航處疏忽失職，簡直係攞乘客安全較飛。
其實，新空管系統得物無所用，唔止暴露航空安全存在漏洞，更加凸顯民航處管理混亂不堪。正如有立法會議員踢爆，民航處監管失職以致空管服務延誤，而申請撥款後又隱瞞醜聞，更加係錯上加錯。同樣混帳嘅係運房局，作為民航處嘅頂頭上司，一二年下半年已經知悉新系統有問題，竟然瞞而不報，你話唔係官官相護都冇人信喇。事實證明，港產官僚同嗰套新空管系統都係一樣，中看不中用，簡直就係物似主人形！
話時話，民航處烏煙瘴氣，醜聞點止咁少吖。就講坐落赤鱲角機場、耗資二十億元建造嘅新總部吖，早前被審計署踢爆擅自興建多項豪華設施，搞到成間夜場咁款，卡拉OK房、跳舞室、淋浴間、大電視，應有盡有。民航處官僚沉醉於「舞池浴淋」，仲點會有心機搞好航空安全吖。
咁講啦，民航處烏煙瘴氣，急需整頓，當局聲稱新空管系統明年搞掂，唔知整頓民航處使唔使咁耐呢？會唔會又係官官相護呢？叮！
