城中鏡：日本買樓投資 陳文綺慧擰頭
近排日圓貶值，當地樓價又相對低，有人去彼邦買樓當投資，更有人話匯價低已經着數，買咗樓又可以當度假屋，第日日本樓市升值，依家投資嘅人真係賺到笑。不過，東華三院前主席陳文綺慧（Viola）一聞隔洋置業就擰頭。
陳宇齡（左）及太太文綺慧對投資海外物業興趣不高。
去日本買「磚頭」究竟有乜嘢唔好呢？Viola話，佢同老公陳宇齡早有共識，除非打算移居當地，否則唔會喺海外置業，咁諗嘅主要原因係免得隔山買牛無保障。好多喺異地有物業嘅人都會知道，一旦有咗海外嘅物業，唔少手尾都要跟，譬如安排租務、管理等，絕對唔係買咗就搞掂，所以Viola呢個想法都可以避免一啲後續麻煩。
