城中鏡：謝鴻興孖梁世民夾BAND回春
刷靚棚牙去Ball，係香港牙醫學會每年除夕派對嘅特色，之前除夕夜照樣吸引城中名醫及政商界翹楚參加派對，個個笑到見牙唔見眼。榮升做「老爺」嘅香港醫學會前會長謝鴻興更拿起結他，同牙醫學會會長梁世民（Sigmund）破天荒合組「Vip Band」。香港國際仲裁中心主席王桂壎都出動私伙結他露兩手，配合主音Sigmund，齊高唱《同舟之情》及《紅日》，氣氛高漲。
梁世民（右）第一次「登台」，拍住謝鴻興（左）表演多首經典金曲。
高永文（左起）、梁智鴻及梁卓偉聚首，共同慶賀新一年。
王桂壎彈起結他有姿勢又有實際，台型十足。
謝鴻興自爆首次娶新抱，有新抱茶飲，心情已靚爆，仲透露幾年前重拾結他令佢「回春」。話說佢中學時初次學結他，但考入醫學院後要挑燈夜讀，結婚後又忙搵食，有次搬屋時，老婆仲將佢個陳年結他丟落垃圾桶，認真無癮。直至四年前，大仔送上新結他賀佢生日，於是有藉口再夾Band，當堂生猛晒，「回春」效力勁過打去皺針。
梁世民沖涼房練歌
Sigmund都戥老友開心，登台前除頻頻喺沖涼房練歌，仲專登將棚牙刷到立立令。佢自爆開咪唱歌一刻，驚到雙腳不停在震，但大家只見佢笑到四萬咁口，睇唔出喎。
晚宴上，名醫名人到賀，官場有食衞局局長高永文，醫學界有元老嘅「金刀梁」梁智鴻、香港大學醫學院院長梁卓偉、牙醫管理委員會主席李健民、香港醫療專業人士協會主席江明熙、醫專會副主席鄭淇德等，大家相見歡，傾得高興、玩得開心。
