政壇：進軍電動車業郭台銘另有玄機？

台灣富豪郭台銘嘅鴻海集團早排入股和諧汽車，近日間公司再宣布計劃收購電動汽車製造商，內地政府扶持電動車行業嘅政策大家都知，郭台銘入股嘅公司究竟係要搭住政策市嘅順風車，定另有玄機呢？

去年十二月底，和諧汽車引入鴻海全資附屬公司富士康，成為咗第二大股東，持股大概11.76%，冇幾日之後，和諧汽車就話想收購浙江綠野汽車，染指電動車行業。中金研究報告仲話，日後綠野汽車同鴻海緊密合作，和諧汽車開始正式進入電動車製造領域咁話。

郭台銘借住和諧汽車進軍電動汽車，究竟係咪要同比亞迪鬥呢？真係有無限嘅想像空間。

傳聞話，郭台銘旗下嘅富士康同比亞迪，一直都有牙齒印，睇番啲資料，佢哋仲打過官司添，都係離不開搶生意、挖角、商業紛爭等等，誰是誰非無法得知，大家惟有睇實以後電動車市場嘅較量。