查黑金手下留情 立法會議議相護
西諺有云，火雞唔會投票支持聖誕節，意思即係冇人會做對自己不利嘅事。呢，家陣立法會正內部調查泛民議員收受壹傳媒老闆淫賤黎黑金嘅醜聞。咪畀人睇死，自己人查自己人，搞一輪大龍鳳，最後咪又係高高舉起，輕輕放下。
係人都知，天下冇免費嘅午餐，淫賤黎更加唔係開善堂嘅，佢自己都老實咁話「細佬唔係省油嘅燈」，畀咗錢，梗係要求對方回報。事實上，包括李卓人、梁家傑、毛孟靜、梁國雄、涂謹申在內嘅五名反對派政客，一來未依規矩申報收取嘅利益，二來有人收錢後為壹淫媒保駕護航，行賄收賄嘅嫌疑水洗都唔清。
好嘞，喺巨大民意壓力下，立法會議員利益監察委員會決定調查事件，早前將梁家傑放生，已經引起全城嘩然，點知尋日再放生埋毛孟靜，至於其餘三人，就話因提交嘅資料未能釋除委員疑慮，要求佢哋稍後出席閉門會議進一步解釋，仲話如果佢哋拒絕，可以引用特權法傳召咁話。
真係諗極都唔明，無論係出錢嗰個抑或收錢嗰啲，早就鬼拍後尾枕乜都認晒，媒體甚至連淫賤黎嘅入數簿資料都登過，究竟仲有乜嘢好查？所謂閉門會議作進一步解釋，不過係走過場蒙騙市民嘅啫。
無計喇，正所謂花花轎子人抬人，咪睇班尊貴議員平日滿口仁義道德，好似好大義凜然咁款，實際上有好多唔見得光嘅嘢，泛民係咁，建制派亦唔好得幾多，既然大家半斤八両，梗係今日留一線，他朝好相見啦。立法會早前修訂處理議員利益申報程序，結果一致通過放寬有關規定，就係最典型例子嘞。所以話啫，港府有官官相護，議會有議議相護，天下烏鴉一樣黑嘅咋。
嗱，議員就唔肯自己查自己o架嘞，咁廉署係咪應該出手呢？講開廉署咯喎，同樣嘥氣。以前就話「香港，勝在有ICAC」，點知近年好似食咗十擔豬油咁，打貪有氣冇力。就講「香江三大貪案」吖，除咗前政務司司長許仕仁已經伏法，淫賤黎黑金醜聞話就話已經立案，但久久未見進一步行動；至於貪曾、貪湯案咯喎，更加係泥牛入海，好似冇咗件事咁，唔怪得香港廉潔指數跌跌不休啦。
講多無謂，食多會滯。唔該廉署拿拿臨將雙貪、淫賤黎等敗類落鑊，如果唔係，香港廉潔之都嘅金漆招牌，直接送去堆填區都得咯，叮！
