城中鏡：「皇阿瑪」訪港 葛珮帆變小粉絲
成日喺戲中飾演「皇阿瑪」形象深入民心嘅內地著名演員張鐵林，相信大家好有印象，日前佢以世貿聯合基金會總會大使身份來港出席活動，咁啱立法會議員EQ葛珮帆係總會名譽主席之一，兩人相遇，EQ隨即變成小粉絲，仲將二人合照放上社交網站添！
葛珮帆（左）大讚張鐵林好有氣勢。（互聯網圖片）
張鐵林飾演嘅「皇阿瑪」（前排中），深入民心。（資料圖片）
EQ大讚張鐵林真人好有氣勢，又留意到佢坐咗成個鐘都腰板挺直、目光凌厲。EQ話好多香港人淨係知道張鐵林將皇阿瑪角色演得活靈活現，但就唔知佢博學多才嘅傳奇一面，包括曾經做過搬運工人，後來考入北京電影學院表演系，更曾赴英國皇家電影學院留學等，○五年起仲擔任廣東暨南大學藝術學院院長。睇嚟EQ呢個小粉絲真係做足功課喎。
