城中鏡：梁天富搞展覽着緊人流管制
前日沙田馬場舉行博愛盃賽，一班博愛醫院董事局成員早早到場支持，非常熱鬧。見到經營展覽行業嘅總理Eddie梁天富，講起日前上海人踩人意外慘劇時，佢話經常都會喺內地籌辦展覽，對於人流管制等安排非常着緊，發生今次慘劇後，業界非常關注舉辦活動的應變措施。不過，好在佢哋以舉辦製造、機械等專業展覽為主，人流相對較少，所以問題不大。
梁天富話每次舉辦展覽都會同官方預先商討緊急應變措施。
何榮添（左）同太太出席博愛慈善盃賽。
陳李妮投資同購物一樣有智慧，鍾情升值不俗嘅翡翠。
講到香港嘅展覽場地唔多，Eddie就話其實地方偏遠並唔緊要，因為有心睇展覽嘅外國買家都會照樣飛來香港參觀，但展場周圍嘅配套就好重要，如果附近乜都冇，一班人去完展覽就被迫要即刻離開，浪費咗唔少商機。講番博愛醫院去年嘅籌款成績，主席何榮添話雖然去年經濟一般，但勝在一班善長踴躍支持，目前籌款已順利達標。
底特律掃平樓 眾人Say No
至於新一年投資策略，何榮添留意到早前解除破產保護令嘅美國底特律因經濟低迷，一幢獨立屋僅以低至一萬美元拋售，吸引唔少投資者搶購，可惜佢嫌地方太遠，加上平日唔鍾意坐超過三小時嘅飛機，喺當地買樓又要花一大筆管理費，所以都係唔考慮喇！
同場嘅副主席Lily陳李妮都有同感，認為投資同購物一樣，都要「買得有智慧」，覺得底特律治安唔好，「平嘢冇好嘢」咁話。見佢身上戴住個別致嘅十字架翡翠心口針，原來佢購買珠寶一樣精明，對升值潛力不俗嘅翡翠情有獨鍾。不過，佢最珍貴嘅翡翠手鐲就唔捨得戴嘞，驚整爛或刮花，所以暫時擺喺屋企欣賞吓先喎。
