政壇：泛亞全男班搞Kitty樂園
中國首個Hello Kitty樂園啱啱開張，相信令到唔少內地少女熱血沸騰。有份參與設計樂園嘅泛亞國際尋日搞傳媒午宴，好多記者就非常好奇，點解泛亞高層個個都係大男人，Hello Kitty項目對佢哋嚟講會唔會好棘手呢？身為公司行政總裁，同時又係景觀設計師嘅陳奕仁就笑言，「難唔難搞唔係睇乜嘢project，而係睇client！」
陳奕仁（中）話客戶最緊要係信得過設計師嘅專業。
追問佢覺得邊類型嘅客最難湊？佢就話其實個客喺設計方面有冇觸覺唔係問題，最緊要係信得過設計師嘅專業，又話公司會根據客戶嘅性格去安排番啲合適嘅設計師。
咁又係o架，如果個客品味麻麻但又堅持己見，設計師都好難做嘅。點都好，都係大家有良好溝通先係最緊要。
