政壇：梁卓偉籲港童多練手力

小朋友愈來愈肥已非新鮮事，但雙手唔夠力就真係好少聽到嘞！香港大學醫學院院長梁卓偉講笑話，依家啲年輕人似乎鍾意做「鍵盤戰士」多過做「體能戰士」，成日唔做運動，手握力都唔夠，抵抗力又差，擔心佢哋再係咁，慢性病愈來愈多，個個變晒「孱仔」喎。

梁卓偉話手握力係重要健康指標，練得好可以腦筋靈活啲。

借《道德經》拋書包

梁卓偉出席一個關於香港學童體適能嘅數據發布會，見到港童體重超標又癡肥嘅問題愈來愈嚴重。當佢見到學童手握力測試成績差強人意時，終於忍唔住要「拋書包」慨嘆港童體質實在太「弱雞」，全因個個自細唔做運動。

佢引用老子《道德經》五十五章其中一句「骨弱筋柔而握固」，證明古人已經一早畀足健康貼士，意思係自小筋骨夠軟，而且拳頭握得夠力，就代表精氣凝聚集中、健健康康。