政壇：新民黨強攻誓拆公文袋

公文袋上次因外傭居港權一役導致區選失利，但爛船都有三斤釘，部分中產區依然係佢哋天下，尤其係東區區議會康怡同康山兩個「孖區」，前者係工程師陳啟遠、後者係市場策略主任梁兆新，都係以專業贏取當區選民歡心。聽講操盤人今次打算由新民黨負責攻堅，誓要奪取呢兩個選區，將公文袋從東區連根拔起。

去年底起落區插旗

有柯打落嚟，新民黨當然唔敢怠慢，舊年底已開始派出兩位專業人士落區插旗，一位係律師江玉歡、另一位就係基金分析員洪龍荃。江玉歡喺早前佔領行動期間，替建制派擔任先鋒，一手發起法律界默站行動，呼籲佔領人士立即撤離馬路，斥責佔中三子漠視法庭禁制令，成功獲建制派垂青出選。而洪龍荃就有「90後少年股神」稱號，讀書時已經贏得股票模擬投資比賽冠軍。

據新民黨中人評估，兩位新人特點都係專業色彩較濃厚，一人主打法律，一人主打金融，相信喺中產選區應該幾吃香，預料兩人手上最大彈藥，都係針對公文袋喺佔領期間支持堵路，既破壞法治亦影響經濟民生。不過，兵來將擋，公文袋當然唔會坐以待斃，聽聞佢哋今次區選盡可能都唔主打政治議題，避免同對手硬碰喎。