青年政策震天響 最怕又係大隻講

嗱，普通人就話冇所謂啫，如果政府年年「許願」年年落空，咁市民就閉翳咯。即係咁，港府月中發表新一份施政報告，下個月發表財政預算案，據講將會聚焦青年問題同房屋問題喎，不過坊間就唔係幾睇好嘞。好似尋日一個論壇上咁吖，有嘉賓話對施政報告同財政預算案有好消息「感到悲觀」，特別係基層扶貧同房屋問題，估計市民要繼續「望梅止渴」；有人更直言對施政報告「完全冇期望」添。

平心而論，今次施政報告主打青年同房屋問題，總算斷啱症。大家有眼見，佔領運動參與最深，表現最激嘅就係八、九十後年輕人。冇錯，佢哋當中唔少人對政制不滿，但更多係表達對上流無望，特別係置業無望嘅憤慨。最近政府宣布推出二千多個居屋新單位，掀起認購潮，當中唔少就係年輕人。至今派出嘅申請表超過十九萬份，仲難中過六合彩，可見房屋問題幾咁嚴峻。

安居夢非常遙遠，咁樂業又點呢？今次施政報告青年政策嘅另一重頭戲，係同非政府機構合作成立一次性青年創業配對基金，資助年輕人創業。原意唔錯嘅，問題係本港營商成本高企，年輕人又欠缺經驗，隨時創業不成仲孭到成身債。至於增加六百個大學學額咯喎，更加係姿勢大於實際，解決唔到根本問題。

所以話啫，施政報告講得再好聽，如果做唔到，盞嘥氣嘅啫。講番房屋問題，港府口口聲聲寸土必爭，實際上係寸步難行，一來政府無能，二來社會泛政治化，反對派大搞不合作運動，乜都反對，乜都拉布，當局即使有再好嘅覓地良方都冇用喇。唔係咩，好似新界東北發展計劃咁吖，明明可以增加大量房屋供應，結果淹沒喺鋪天蓋地嘅反對聲中，而其中反對最積極嘅，居然係呻上車難呻到樹葉落嘅年輕人。真係諗極都唔明，阻止政府拓土建屋，年輕人除咗更難置業，仲有咩好處吖。

都係毛伯伯講得啱︰世界是我們的，也是你們的，但是歸根結底是你們的。上一輩有樓嘅有樓，住公屋嘅住公屋，大多數都有着落，反而年輕人激情過後，係咪應該為自己未來打算吓呢？叮！