城中鏡：慈善歡宴 同享美麗
仁濟醫院歷屆總理聯誼會早前舉行除夕倒數慈善餐舞會，作為該會沉寂多年後重新啟動嘅頭炮活動，歷屆嘅仁濟總理回巢，與數百賓客同樂，一邊倒數，一邊欣賞維港煙花。餐舞會搞手仁濟總理陳李詠詩同Wendy羅穎怡一早到場迎賓，Wendy仲喺現場義賣英國仿真鑽石飾品，以開心價為仁濟籌款。唔少人當場買嚟戴上，襯托當晚Bling Bling華麗閃耀主題。
嚴徐玉珊（左起）首次抱孫，仁愛堂副主席史顏景蓮同董吳玲玲戥佢開心。
陳李詠詩（右）同羅穎怡落力籌辦晚宴。
仁濟副主席林煒珊（右）同胞妹林煒珽結伴出席舞會。
代理珠寶品牌益姐妹
本身係律師嘅Wendy係羅氏針織後人，返家族公司幫手已三年幾，對零售、酒店同商場管理上晒手，近年仲幫手買地起樓。佢話曾經自創一個鞋履品牌，後來被上市公司收購，最近就代理呢個英國珠寶品牌，目的係令城中姐妹用相宜價錢就可以扮靚，唔使下下大出血買真鑽石喎。
講到扮靚，又點少得打扮貴氣嘅仁濟前主席董吳玲玲，當晚佢戴住一對由精緻翡翠同閃鑽鑲嵌嘅吊墜耳環，十分搶眼。董太話呢個設計係佢新嘗試，事關依家大件靚翡翠既貴又難求，所以佢將細粒翡翠重新包裝設計，既掃走單件翡翠嘅沉悶，價錢又冇咁貴，佢都覺得好滿意。
仁濟前主席嚴玉麟同太太嚴徐玉珊亦拍拖到場，好多人上前恭喜佢哋，原來嚴家大仔嚴子杰啱啱生咗個BB女，難怪首次抱孫嘅嚴玉麟同太太成晚笑不攏嘴喇！
