政壇：搞搞政：（舌累）名人談政改 學民盼抬高身價

冇份見林鄭酸溜溜

其實，以公開信邀請政壇中人會面，一直都係學界慣用手法，近期最經典案例，要數學聯喺去年佔領行動初期，向政務司司長林鄭月娥發信，最終雙方於十月下旬破天荒對話，雖然最終冇成果，未能令佔領行動提早退場，之不過無份參與對話嘅學民一直酸溜溜，黃之鋒等人都試過於佔領行動末段，以絕食方式要求同政府官員會面，然而一直未獲當局正面回應。

踏入一五年，學民又再出招發出公開信畀四名政界人士，包括行政會議召集人林煥光、行會成員陳智思、前政務司司長「唐唐」唐英年同埋前財爺「阿松」梁錦松，事關佢哋都曾經講過青年人係香港嘅希望，目標係農曆新年前可以公開會面，討論重啟政改嘅重要性同可行性。

獲邀者反應甚冷淡

唐唐透過發言人回應指出，等政府第二階段諮詢推出，了解內容之後再作決定，阿松就話暫時唔回應，據聞林煥光亦暫冇回應。

睇嚟學民死（舌累）暫未見成果，認真失威。據聞就算真係失敗，學民都打算轉移目標，例如再搵其他行會成員幫手。

講番新一年嘅行動，學民發言人黎汶洛話會趁政改第二階段諮詢，特首梁振英同政改三人組落區時，喺場內場外提問同請願，之後又會擺街站、搞公民教室同寄文宣入屋，當中特別提到郵政署之前話佢哋有一批文宣涉及淫褻不雅，如果今次都唔畀寄出嘅話，隨時會作出司法覆核喎。