政壇：乳鴿起爐灶招納新生代
佔領行動催生大批有志從政嘅雨傘仔、雨傘女，由於佢哋有熱情、有理想，唔少泛民主派嘅政黨都對佢哋虎視眈眈，諗住藉此吸納佢哋呢批後生仔入黨，以壯聲勢。不過，呢頭正當傳統泛民政黨出盡牙力游說時，白鴿黨嘅「乳鴿」、南區區議員區諾軒嗰頭就另起爐灶，夥拍其他政黨新生代成立年輕民主派平台，打算吸納呢啲有志出選區議會嘅新生代。
區諾軒話加入新平台嘅新生代，唔可以揀泛民有意落嘅區嚟打。（資料圖片）
區諾軒話，由於大部分雨傘仔、雨傘女都唔想背負政黨包袱，對政黨提供畀佢哋嘅建議甚有保留，所以佢哋諗住成立一個跨黨派平台，以無政黨背景作號召，希望可以吸引一批新生代加入。佢又話，雖然呢個平台唔似得政黨咁有源源不絕嘅資源，但佢哋幾個勝在有豐富地區經驗，可以傳授佢哋一招半式。不過，佢話如果新生代有意加入佢哋呢個平台，揀區時一定唔可以揀泛民有意落嘅區嚟打，否則會搞到佢哋好難做喎。
