話說財爺鬍鬚曾早前應邀到馬鞍山一間小學出席少年棒球邀請賽，並擔任開球禮嘉賓，佢尋日發表網誌，憶述昔日喺美國讀中學時，喺街頭打棒球嘅日子，話當年由於父母無閒錢買棒球裝備畀自己，佢同朋友發揮創意，用掃把棍改裝成棒球棍，又將馬路當成棒球場，而為咗慳錢，佢買咗較為軟身嘅平價膠波，將佢切開兩份分兩次玩。

鬍鬚曾回顧棒球歲月，自爆當年曾將平價膠波切開兩份分兩次玩。

鬍鬚曾話困乏環境通常會激發小朋友嘅創造性同靈活性，但相比昔日嘅貧窮日子，今時今日嘅小朋友就幸福得多，皆因佢見到棒球隊小隊員着住一身整齊嘅制服，加上佢哋標準嘅投球和揮棒姿勢，令佢肯定呢班小朋友都有接受正統嘅棒球訓練，同佢當年要喺街邊打波，可謂天淵之別。

佢又話由於兩種生活無法比較，所以「誰更幸福」呢個問題，相信永遠都唔會有答案。

第一手消息請下載on.cc東網iPhone/iPad/Android/Windows Phone Apps