政壇：阿Ann改獸醫比例 黨友唔撐

不過，不滿獸醫權力過大嘅立法會議員Ann蔣麗芸就認為如果增加管理局內註冊獸醫人數，將會令管理局側埋一邊，保障唔到寵物主人嘅利益，所以佢諗住就法案提出修正案，將業界同非業界成員嘅比例改為一比一，但就慘被所屬政黨議員叫停。

阿Ann質疑由於管理局有權決定是否就投訴作出調查，如果獸醫代表佔優，將會加強獸醫界嘅保護主義，所以佢想修改兩者比例。但當佢同黨友透露自己有意提修正案時，黨內有人隨即勸佢唔好咁做，事關佢所屬嘅建仔不嬲主張用同政府對話方式解決問題，而唔係郁啲就提出修正案，所以該黨議員一直好少就政府提出嘅法案作出修訂，費事畀人誤會，以為佢哋要同政府對着幹。

擬先見食衞局官員商討

雖然阿Ann都明白黨友嘅苦心，但因為政府對獸醫業缺乏監管，令唔少獸醫都有濫收費嘅情況，對寵物主人嚟講唔公道。佢又話自己之所以咁關心呢條法案，並唔係因為佢屋企有養狗咁簡單，而係因為佢落區時，見到唔少老人家都有養寵物，但由於部分獸醫亂收費，令佢哋有冤無路訴。

佢話會先約食衞局官員傾吓，睇吓佢哋肯唔肯自我更正，別無他法下，先會考慮提出兩項修正案，修改管理局內註冊獸醫同非業界代表比例同上訴機制，監管獸醫業界百病叢生嘅情況。