香港時運低 年尾又殺雞
香港好似撞邪咁，衰運接踵而至。呢，佔領行動搞到烏煙瘴氣，雞犬不寧，市民固然深受其害，連家禽亦冇運行，搞到除夕都要大開殺戒，真係唔到你唔信邪o架。
嗱，由於輸港內地活雞樣本驗出帶有禽流感病毒，漁護署不敢怠慢，撲殺咗長沙灣臨時家禽批發巿場一萬九千隻家禽，而且封場廿一日，停止內地活雞供港。
食衞局局長高永文話喎，打鼓嶺活雞檢查站幾日後開始運作，會等漁護署確認冇問題後至將活雞送往打鼓嶺，再分流至零售點應巿。不過咁，本地業界人士就不滿當局一直漠視將中港雞分流嘅訴求，搞到頻頻殺雞，業界冇啖好食，警告會就當局行政失當採取法律行動。睇嚟好戲在後頭，殺完雞又要拗餐飽。
其實，禽流感威脅揮之不去，殺雞已經唔係新聞。當局次次大開殺戒，令業界生計大受影響，唔怪得怨聲載道喇。廣東省本月中起正式限制活家禽銷售，但香港嘈咗十幾年，到依家仲未解決問題，連中央屠宰都無疾而終。高永文話喎，如果本港維持活雞供應，冇可能做到禽流感零風險，但社會對禁售活雞有爭議，只能夠先做好供應鏈監察工作。一句講晒，當局繼續玩拖字訣。
問題係，港產官僚可以拖，病毒唔會等，除咗禽流感之外，多種疫症亦正兵臨城下。本港日前出現入冬以嚟首宗人類感染H7N9禽流感個案，加上家陣係冬季流感高峰期，而內地早前亦陸續出現至少兩種禽流感病毒，病毒無處不在。不可不知，農曆新年將至，兩地人流川流不息，風險更加倍增。仲有吖，令人聞之色變嘅新沙士同伊波拉病毒，威脅有增無減，一旦防疫戰線崩潰，後果不堪設想。
四疫拍門，警號不斷，點知當局仲係滋油淡定，防疫漏洞處處可見。好似啱啱過去嘅聖誕假期咁，公立醫院急症室逼到爆，內科病床使用率超晒負荷，有醫院甚至去到百分之一百二十二，萬一禽流感爆發，真係唔知點樣應付。最令人憂慮嘅係，社會高度政治化，反對派政客為咗癱瘓政府施政，無所不用其極，隨時令防疫工作添煩添亂。
講到底，有備才能無患。防疫唔係講玩，大吉利是講句，家陣香港時運低，如果惡疫齊齊來襲，攻破城池，未必可以好似上次沙士之役咁好彩，死過翻生o架，叮！
