城中鏡：外遊度假 楊哲安過滑雪癮
話說教育局前政治助理Jeremy楊哲安太太張新悅再為楊家添千金，但Jeremy冇冷落太太，日前撇低未申請護照嘅B女，同大女、二女遠赴瑞士、法國滑雪慶祝聖誕。但Jeremy笑言，原本打算休息吓，點知佢同老婆太鍾意滑雪，由朝滑到晚仲攰過返工。唔知假期仍要返工嘅打工仔聽到有乜感受呢？
楊哲安（後左一）攜妻帶女遠赴歐洲滑雪，慶祝聖誕。（受訪者提供）
Jeremy一家四口上周遠赴瑞士薩斯費（Saas-Fee）同法國Châtel兩大滑雪勝地過足滑雪癮，每朝工作就係送兩女去當地滑雪學校練習滑雪，然後兩口子就瘋狂滑雪到天黑先收工，認真識歎。
