港隊盲人足球隊今年將衝出香港,遠赴首爾參加世界賽。身兼黃大仙區議員嘅青年議會副主席Roy丁志威日前同香港盲人體育總會,舉行一連兩日友誼熱身賽,吸引亞洲多支勁旅過江挑戰,小型足球會會長霍啟山都冒寒去觀戰。但原來盲人足球唔易踢,難度相當高。

中國隊勇奪冠軍,霍啟山(左一)、丁志威(右一)齊頒發獎盃予球員莊家彬(中)、教練朱艷光(右二)同許一飛(左二)。

失明球員鬥志堅毅,陳婉珊(左)同馬鴻銘太太蔡加敏(右)都深受感動。

羅德榮(左)為港隊失明球員徐文俊(中)同助教陳冠華(右)打氣。

今次熱身賽吸引來自中國、泰國、印度同馬來西亞的盲人球隊參賽。阿Roy睇好中國隊,趁休息時間蒙住雙眼,落場與球員一決高下,誰知踢「盲波」難度相當高。阿Roy話雖然足球經特別設計,滾動時發出噹噹響聲,但球場上太多雜聲,要「聽」住個波飛咗去邊,又要預測隊友走位,有如喺黑暗中玩捉迷藏,無從入手。香港盲人體育總會副主席羅德榮都接受挑戰,誰知踢咗五分鐘就索晒氣:「唔好講話踢,我連聽個波喺邊都未聽到。」

霍啟山讚默契球感好

比賽當日,愛踢小型足球嘅啟山喺場邊睇得津津有味,表現興奮。佢話首次親身睇失明人士踢波,估唔到隊友間默契咁強,球感敏銳。雖然眼中無球,但心中有球,令人佩服。佢又讚港隊有潛質,希望為佢哋爭取更多可供練習嘅室外人造草地場,提升技巧。

盲人體育總會創會主席孫國華、主席周德煒都喺場邊做啦啦隊。賽事鬥得難分難解,最後由中國隊以二比一擊敗泰國隊奪冠,港隊就未能進身總決賽。但賽後阿Roy同青年議會會長馬鴻銘及主席陳婉珊,齊號召約五十名義工請班球員品嘗香江美食,又接送佢哋去機場,認真唔話得。

第一手消息請下載on.cc東網iPhone/iPad/Android/Windows Phone Apps