古舊的收銀機、簡潔的廚房，文叔的快餐店不單擺設保持「原貌」，價錢亦一樣。「開張咁耐只係加過一次價，好似係九七回歸前。」文叔雖然作風低調，事迹卻吸引不少網友慕名而來，他都樂意與網友分享往事，但堅拒金錢資助：「試過有網友畀多五十蚊話支持我，但我都還返畀佢，同佢講我仲應付到。」

家住天水圍的網友黎先生得知文叔事迹，早前和朋友特別來光顧：「依家好少人會諗要互相幫助，太多人急功近利，要有多啲好似文叔呢類人。」不過他亦承認兼顧賺錢與人情味絕不容易：「賺到錢就會少咗啲人情味，錢同人情味好難平衡。」文叔的事迹在網上瘋傳後，受到網友「勁Like」，原來亦為文叔帶來少許麻煩。文叔笑說：「我每日預備嘅材料都係啱啱好，有時啲網友來傾計食嘢，啲餸就畀佢哋食晒，失咗預算，惟有急急腳再去買餸先可以煮畀啲熟客。」

第一手消息請下載on.cc東網iPhone/iPad/Android/Windows Phone Apps