SUN揭秘：平民餐傳愛 膳心二十載
十五元品嘗到足料扒餐，在香港似乎難過登天。九龍城的「飛馬快餐」老闆李漢文為照顧弱勢，二十多年來堅持炮製廉價美食。年屆六十九的李漢文一人身兼廚師、收銀、侍應、洗碗，為的就是節省成本，確保食物以低價出售。快餐店雖已完成歷史任務正式轉手，但李期望新老闆仍能延續「傳統」，繼續關懷基層市民。
唔捨得啲街坊，佢哋都有叫我唔好走，但我都會不時返嚟坐。
文叔（左）與網友黎先生分享往事。
文叔仍保留二十多年前的收銀機。
雖價錢低廉，但飯盒分量絕不欺場。（互聯網圖片）
快餐店食物價廉物美，深受基層歡迎。
寒風凜凜，穿着單薄的短袖衫丶人稱文叔的李漢文站在快餐店門口，和慕名而來的顧客談笑風生。縱然滿頭白髮，文叔仍然堅持一腳踢，每日限量炮製三、四十人分量的廉價美食，一碟扒飯只需十五元，餐蛋飯類更低至十三元，目的是讓綜援人士可以得到溫飽。主打基層生意，全因文叔深明基層之苦，「細個嗰陣我哋屋企好窮，阿媽去屋企附近啲食肆幫手，人哋就畀啲餸尾我哋食。」後來文叔在學校飯堂幫手，除了賺取一頓飽飯外，更令他廚藝突飛猛進，受人恩果千年記，文叔一直緊記做人不能忘本，學有所成後，決定盡自己所能回饋社會。
與街坊互信 收銀機唔使鎖
八十年代尾，文叔與拍檔一起經營「飛馬快餐」。「大家都有個共識係做低下階層生意，薄利多銷。」後來快餐店建立「口碑」，月尾不少社工帶綜援人士、癮君子到快餐店吃飯，文叔亦無任歡迎，慢慢快餐店成為邊緣人士的飯堂。兩年後拍擋另起爐灶，留下文叔和一名女工打理餐廳，後來連女工亦離開了，剩下文叔一人支撐大局，一撐就撐到現在。「以前我會預一個禮拜食材，最忙時一日可以賺二千蚊。依家淨係預一日材料，賺得三幾百蚊都用埋嚟交租同買材料。」生意比全盛時期跌足九成，但文叔直言夠晒數：「夠錢交租同燈油火蠟，業主好好人，依家都只係收我六千蚊租。」但自己生活會否成問題？文叔幽自己一默說：「我搭車兩蚊之嘛（長者優惠），賺嘅錢都夠搭車。」
除了打理快餐店，文叔更常與街坊「打牙骹」，建立互信，「朝早我會喺報檔買啲報紙放喺快餐店門口，街坊路過攞一份就放低錢，有時啲街坊冇帶錢，第二日都會畀番，我依家去買餸都唔會關門，收銀機都唔使鎖。」不過文叔承認曾有顧客吃飯後逃之夭夭，但他選擇豁然面對：「就算畀你呃十餐、八餐，都係一百幾十蚊，但貪嗰少少錢就連人格都冇埋。」
天下無不散之筵席，文叔最終都要和街坊說再見。文叔上月底正式將店舖頂讓給一名熟客，新店會改為車仔麵店。「個客一直都話想頂我間舖嚟做，我應承佢話退休就頂畀佢，我都有同佢講租呢度唔知幾時賺得番，佢就係話貪呢度人唔多，同埋肯照顧我啲客，所以我先肯頂畀佢。」對於快餐店結業，文叔雖不捨，但自言是退而不休：「唔捨得啲街坊，佢哋都有叫我唔好走，但我都會不時返嚟坐。之後可能會去社區中心做吓義工。」非以役人，乃役於人，正是文叔一生的寫照。
