政壇：搞搞政：宣傳經民聯身份 區議員索價開大口
今年政界嘅重頭戲除咗政改，年尾嘅區議會選舉都好有睇頭。經民聯呢兩年一直出動銀彈「收購」多名區議員，但用錢買到人，買唔到個心，最近更被踢爆唔少區議員喺區議會網頁上，根本無申報係該黨成員，唔知經民聯嘅正副主席梁君彥同林健鋒有乜感受呢？但聽聞事後該黨高層下令，要班區議員一個月內印番經民聯標誌，點知有區議員獅子開大口反索價每月一萬元做「宣傳費」，聽聞呢個要求激到班經民聯高層紮紮跳，聲言一定唔會科水咁話。
設計圖片及對白
部分人嫌津貼少
每逢區選臨近，區議員嘅價值就會以幾何級數上升，有區議員「待價而沽」，今年亦唔例外，聽聞被經民聯「收購」嘅區議員，分成兩類人士，一類認為經民聯每月津貼得幾千元，所以對外只係報稱係獨立人士，如果經民聯硬係要佢哋喺地區工作同區議會網頁顯示經民聯個名同標誌，唔係唔得嘅，但就要增加津貼囉。有少數人仲獅子開大口，叫價每月多一萬元資助。
另一批區議員就睇得遠啲，因為區議員最大價值係擔任立法會選舉「樁腳」，如果經民聯無得玩直選，咁區議員掛住該黨牌頭，就無得做其他政黨樁腳，即係得物無所用，所以呢類區議員一直持觀望態度，唔肯瞓身押注落經民聯，亦係佢哋唔肯申報該黨身份嘅原因。
被區議員咁屈法，經民聯高層條氣梗唔順啦，佢哋願意加碼泵水，但每月加多一萬元資助就無可能。因為磅完水都唔代表有回報，呢啲情況當年屢次發生喺自由黨身上，相信經民聯高層見過鬼怕黑，唔敢再做人肉提款機。
