政壇：加薪未落實公務員愁爆

老實講，公務員本身都好心急，唔想加薪一拖再拖，政府人員協會最近就向會員進行抽樣調查，合共收回一千四百多份問卷，近八成七受訪者對立法會仍未通過公務員加薪議案感到厭煩，六成六更表示因而影響日常生計，有九成一更加希望有關議案盡快通過。該會促請議員停止拉布，讓公務員加薪一事早日落實。

其實，職工盟多個屬會早前發起聯署，包括教協在內，話遲遲唔加薪，搞到教師好躁，要求政府調整財委會嘅議程，先通過公務員嘅加薪建議。之不過，最諷刺嘅係身兼職工盟秘書長嘅立法會議員李卓人都有份拉布，係始作俑者之一，要過到公務員加薪建議，職工盟要求政府調動議程，不如嗌停李卓人收手先喇！