做高官要有乜嘢條件?當然係把口要夠密啦!點解咁講?第二輪政改諮詢隨即展開,因應佔領行動期間而撰寫嘅民情報告亦已準備就緒,咁啱日前我哋遇到政制及內地事務局副局長劉江華,當然要問吓佢搞成點啦,點知佢把口鬼咁密,第二輪政改方案有無討論空間、民情報告寫咗乜嘢,都隻字不提,就連份報告有幾多頁都唔肯講。咁啱之後我哋又遇到曾任政制及內地事務局局長嘅前政務司司長林瑞麟,佢把口又係撬極都撬唔開。 

設計圖片

「留畀傳媒總結」

劉江華乜嘢都唔講,咁問佢有無將泛民主派嘅意見寫入報告,佢淨係慨嘆話,寫唔寫、寫幾多都係會被泛民鬧o架啦,總之報告內容要拭目以待。劉江華不談政事,但談風月,話自己之前去東京同大阪旅行,不知幾梳乎,仲話佢去完就輪到佢「老闆」、政制及內地事務局局長譚志源去添!

點解佢哋兩個咁得閒去旅行?原來民情報告時序上只係去到銅鑼灣清場嘅階段,清場之後兩位局長仲有時間處理埋第二輪政改諮詢口號同宣傳品,所以就可以放吓假、休息吓。咁宣傳口號係乜嘢呢?當然都係嗰句「不便透露」囉!

其實,高官口密都唔係乜嘢新鮮事,話說前日我哋喺香港會所見到林瑞麟食完午飯離開,問佢對於一四年完結,有乜嘢感受最深或重要大事回顧,佢就即刻話唔提政治時事嘅嘢,笑笑口話呢啲留番畀傳媒去總結喎。

問佢最近忙緊乜嘢?佢就話都係忙住出入教會,連聖誕及新年都唔會特別出去玩喎!睇嚟「有事封口」、開口就「只談風月不談政事」,都應該係歷任高官應付傳媒嘅金科玉律。

第一手消息請下載on.cc東網iPhone/iPad/Android/Windows Phone Apps