鬍鬚曾自打嘴巴 守財奴死性不改
奇聞呀奇聞，財政司司長曾俊華一向鍾意玩「狼來了」把戲，預算案例牌高估開支低估收入，估唔到佢近日竟然一反常態，指未來三年「年年有餘」，其中下個財政年度將會「由虧轉盈」添，唔通正如有人話齋，佢突然轉性？
梗係唔係喇。鬍鬚曾慣咗哭窮，今次突然變得「樂觀」，其實只係為自己估錯數補鑊咋。呢，佢嘅網誌係咁講嘅，下個財政年度之所以由虧轉盈，係因為原本預計嘅五百億元醫療融資開支，比原先預算嘅低喎。其實，就算呢筆開支真係低過預期，都冇可能令整體財政由虧轉盈，鬍鬚曾自打嘴巴，不過係搵下台階啫。
話時話，鬍鬚曾估錯數，大家早就見怪不怪咯。年年預算變失算，表面上係算術差，實際上係製造政府「莫財」假象，巧婦難為無米炊咯喎，咪可以推卸責任乜都唔使做囉。呢嗱，鬍鬚曾呢頭話未來三年「年年有餘」，嗰頭又重彈舊調，強調審慎理財、量入為出喎。佢仲話，七年後可能出現結構性財赤，政府有必要為重要嘅公共政策作財政規劃，早排成立嘅「房屋儲備金」就係一個例子嘞。
唔講猶自可，一講把幾火。有人計過數，港府要實現十年興建廿九萬個公營房屋嘅目標，需要數以千億元，家陣淨係向儲備金泵二百七十億，連杯水車薪都不如；又好似全民退保咁吖，議而不決，拖得就拖唔在講，就算老年金方案最終可以落實，港府除咗一次過注資五百億元，乜嘢承擔都冇。所以話啫，江山易改，本性難移，旨意孤寒財主開倉濟民喎，發夢都冇咁早喇。
即係咁，應慳則慳，應使則使，本來係公共理財嘅ABC，何況香港既冇外債，財政儲備更加係世界數一數二，港府窮到只剩下錢，可惜吖，當局唔單止欠缺長遠承擔，連最簡單嘅還富於民都唔肯。呢，鬍鬚曾話呢幾日正「閉關」撰寫出年嘅財政預算案，究竟有乜搞作呢？慌唔係諗有乜藉口「減甜」咩？
講到呢度，太一叮想同鬍鬚曾講個歷史故事。明神宗出咗名係守財奴皇帝，一味掛住儲錢，無論係賑災或平定民變，統統耍手擰頭，後來打開庫房一睇，先發覺啲金已經發晒霉，無耐仲亡埋國添。今時今日香港社會撕裂，矛盾日益尖銳，港府繼續漠視基層市民苦況，等到民怨大爆發，就算有再多錢都冇用喇，叮！
