城中鏡：跌銀包獲奉還 徐英偉撐港多好人
平安夜解款車跌錢案至今仲有八百幾萬元款項未搵得番，唔少人都覺得拾遺不報嘅人唔要得。不過，民政事務局政治助理徐英偉尋日就喺社交網站為香港人平反，透露自己尋日喺樂富街市買餸時，跌咗個銀包，當佢買完野後諗住走人，有舖頭老闆娘即時截停佢，話執到佢個銀包，叫佢盡快去詢問處領回。
徐英偉（後排右三）早兩日同太太及兩個囝囝去歐陸嘉年華玩。
佢大讚老闆娘誠實又好人，話要畀十萬個「讚好」對方，又話雖然唔少人覺得香港人貪心，但尋日件事就可以證明唔少港人都係好人，就算天降橫財都唔會將佢據為己有喎。
啱啱過去嘅聖誕節，佢無同家人旅行，而係留喺香港「環遊世界」，如前日就陪家人去咗歐陸嘉年華!
