政壇：搞搞政：鬍鬚曾解畫守財奴冇「轉性」
向有「守財奴」之稱嘅財爺鬍鬚曾，年年喺公布財政預算案前都會低估收入扮「狼來了」，壓低市民對派糖嘅期望。但大家點都估唔到，佢會喺預算案公布前夕大開水喉，突然撥二百七十億元成立房屋儲備金，仲喺上周嘅網誌話希望未來三年都做到「年年有餘」，令外界唔少人都質疑佢係咪「轉性」，一改以往保守作風。
設計圖片及對白
一個星期後，佢尋日喺網誌上解畫，話確有提過未來三個財政年度可以維持「年年有餘」，仲話呢個預測唔係得個講字，係根據預算案嘅「中期預測」推算。話口未完，佢又話就算短期內政府財政充裕，唔等於以後年年都有盈餘，更加唔代表政府會派錢，強調自己從來無「轉性」，聲稱仍然係信奉審慎理財、量入為出原則，因為做咗財爺咁多年，眼見唔少外國政府因為債務問題而出現金融同管治危機，令佢更相信穩健財政唔止係一份亮麗帳目，仲可以影響深遠喎。
稱設儲備金防患
佢又話作為財爺，如果明知將來環境有可能逆轉，仍然無及早作出準備，防患於未然，係極不負責任嘅做法，所以今次突然設置二百幾億房屋儲備金，就係藉現時財政充裕而做足準備。既然佢識得咁諗，終於識使錢以防不時之需，咪即係轉性囉，點解又要否認呢？
正當大家以為佢會閉關至寫完預算案為止，點知佢尋日突然出席四年一度嘅「沙田節」棒球活動，仲化身成棒球小子，先做投球手，然後再拎住碌棒球棍成功擊球，而且一擊即中，唔通佢暗示畀大家聽，政府係時候重錘出擊？
