政壇：富貴青年團要撲水

李梓敬話該黨一向崇尚「自力更生」精神，所以由年中開始，就削減對青年團嘅資助，由之前按活動提供資金，變成要佢哋自負盈虧。佢當時心諗「死啦，點算？」但依家已經雨過天青，短短半年間就已籌到二十萬元添！雖然要周圍撲水，但佢仍然覺得係件好事，仲話過程中見到好多團員出心出力。

唔好以為無咗黨資助，佢哋就會好拮据，其實青年團都有唔少收入來源。李梓敬話青年團每兩年已向團員收一百元會費，而每兩個月一次喺酒吧搞嘅「Social Wednesday」黨友聚會，都會收一百幾十入場費，計落其實有賺添，所以都冇乜經濟壓力。

不過，個黨都唔係完全停止向青年團泵水嘅，去到啲重要情況，好似有團員參選區議會，或落區做社區主任，費用都係照樣由個黨出。照咁睇，正經嘢就泵水，吃喝玩樂就自負盈虧，其實都幾合理吖！