政壇：中史列必修科教界掀口水戰

港台節目《城市論壇》尋日討論國民教育身份問題，教育工作者聯會主席鄧飛話最近港人對國民身份認同嘅評分創新低，係由於現時學校課程未能讓學生了解國家歷史，以及傳媒多報道國家負面新聞導致，佢建議將中史列為初中必修科，並規範課程內容，畀學生對中國近代發展有全面嘅認識。

保衛香港運動傅振中就將港人缺少對國家身份認同，歸咎於港英殖民時期，未有推行國民教育，同埋最近喺香港發生佔領行動等而造成。

不過，教育專業人員協會馮偉華認為，港人對國民身份認同低，同近年內地發生不少事件與香港信奉嘅核心價值偏離很遠有關，加上港人對未來政制發展感灰暗，直接影響對內地嘅印象。

馮偉華又話有人以為不斷唱好內地經濟發展，將言論自由收緊，就可加深國民身份認同嘅想法係「斷錯症」，重申中史科係咪列為必修科，應經過專業討論同社會共識，若果將中史科視為灌輸工具係好危險嘅，而中央亦應該尊重香港嘅核心價值。