政壇：「小特首」向吳得掂挑機
自一二年出任教育局局長嘅「吳得掂」吳克儉頻頻外訪，兩年半內外訪超過二十次，外訪開支更超過三百六十萬元。雖然佢死撐話有需要外訪，但一班「小特首」尋日發公開信，約吳得掂見面，當面質詢教育政策，向佢問責。
設計圖片及對白
香港小童群益會尋日舉行第七屆「香港小特首」《小小施政報告2014》發布會，今年嘅主題係「我有我的起跑線」，整份報告主力探討教育範疇，睇嚟連學生都好關心本港嘅教育制度。其中一名「小特首」馬思澄話，一班「小特首」喺過去九個月走訪參加「全校融合政策」嘅中學及提供「兼收服務」嘅幼兒學校，發現唔少教師都要應付繁重嘅教學同行政工作，為佢哋帶嚟沉重壓力，希望教育局為有志從事特殊教育嘅老師提供多啲協助。
倡倣效台灣做法
馬思澄又話「小特首」們四月時曾經探訪台灣嘅特殊教育學校，發現當地喺推行分流配對方面有良好效果，建議吳得掂參考有關做法。一班學生去一次台灣，已留意到當地值得學習嘅地方，相反吳得掂自上任以來，外訪足迹遍及多個內地城市，同埋英國、加拿大、美國、韓國、新加坡、澳洲同新西蘭等地，但仍未揣摩到適合香港嘅教育政策，咁佢係咪應該反省吓呢？
另一名「小特首」馮心怡就話，吳得掂推出眾多政策中，最令佢印象深刻嘅係前年嘅德育及國民教育科風波。佢就唔多認同呢科嘅宗旨，「認識中國歷史係好，但用灌輸嘅方式就唔恰當，學生冇需要喺唱國歌時流眼淚」。佢又話教育局搞唔好融合政策同特殊教育，好明顯係同學校溝通不足。佢唔知道吳得掂曾多次外訪，淨係希望局長可以抽時間同佢哋見面啫！
擔任主禮嘉賓嘅政制及內地事務局副局長劉江華就謙虛得多，話自己依家喺政府嘅情況就好似喺起跑線上。咁又係，點似得吳得掂咁識「飛」吖！
