居屋派表爭崩頭 無殼蝸牛倍添愁

嗱，新一期居屋開始派表，連日來都有大批市民排隊，最誇張嘅時候有近千人輪候，一度要等個幾鐘至攞到表，結果淨係第一日就派出近四萬份表格，搶手程度可見一斑。唔使問阿貴，到截止申請嘅時候，申請人數必定更加墟冚，超額認購倍數隨時創新高，相對於今次只推出二千一百幾個單位，簡直係杯水車薪，仲難過中六合彩咁滯。

大家咪以為呢批新居屋單位平靚正吖，正如有人話齋，新居屋又細又聚唔到財，而且由於設計騎呢，唔少單位大門對正廁所，令人嘆為觀止。不過咁，無殼蝸牛根本冇得選擇，就算新居屋問題多多，都要爭崩頭認購。有位七十幾歲嘅阿伯就講得啱嘞，唔買居屋又可以點吖，唔通睇住子女婚後仲要住劏房咩，所以咯喎，佢情願攞埋棺材本出嚟，幫四個子女付首期買居屋。

正所謂，可憐天下父母心。呢位阿伯嘅心情完全可以理解，今時今日私人樓價係咁飆升，租金水漲船高，年輕人要靠自己能力置業，可以講係遙不可及嘅夢想，於是乎，居屋成為好多人置業嘅唯一選擇。蘇州過後冇艇搭，呢次上唔到車，唔知要等到幾時至有機會嘅喇。

唔係杞人憂天o架，現屆政府話就話將房屋問題列為施政重中之重，仲推出未來十年建屋四十八萬個單位嘅目標添，可惜講時容易做時難，港府動輒得咎，拓土大計阻力重重，分分鐘成為空中樓閣。就講公屋吖，未來五年僅得七萬七千個單位落成，距十萬個單位嘅建屋目標仲差二萬幾個，當局想再加碼，根本係不可能嘅任務，隨時又係畫餅充飢嘅咋。

講嚟講去，罪魁禍首就係前朝貪曾政府，佢翹埋雙手乜都唔做，坐視房屋問題不斷惡化，搞到地價高、樓價高、租金高嘅「三高」，咪形成今日嘅困局囉。雖然現屆政府想撥亂反正，但就有心無力，尤其係反對派全面不合作，更加令當局寸步難行。試諗吓，連新界東北發展計劃都郁唔到，當局又有乜辦法增加土地及房屋供應呢？

不能安居，怎能樂業，房屋問題成為港人揮之不去嘅噩夢，當局束手無策，無殼蝸牛除咗望天打卦之外，仲可以點做吖，叮！