城中鏡：何倍倩遊日 唔預龍鳳胎
難得有個聖誕假期，恒生新抱何倍倩（Anina）同丈夫帶埋五歲大嘅仔仔去日本北海道旅行，今次一去就成個禮拜，然後先返港同一對龍鳳胎及其他家人開派對慶祝聖誕。
何倍倩好重視聖誕節，旅行之後都要再開派對慶祝。
北海道出名凍，Anina早前專登買咗頸巾、保暖耳罩同埋有聖誕氣氛嘅頭飾，佢透露，今次去北海道打算同囝囝滑雪、浸溫泉同睇黑熊，至於一對龍鳳胎就留港，Anina話：「因為一對龍鳳胎只有歲半，所以無預佢哋去旅行，小朋友咁細亦唔適合去旅行，否則只會辛苦自己，去完佢哋又唔記得。」
旅遊返嚟，佢都預備定火雞及薑餅煮聖誕大餐，又買定小朋友同老公嘅聖誕禮物，她笑言﹕「依家囝囝仲信有聖誕老人，小朋友每人有一對聖誕襪，我話乖嘅小朋友先會收到聖誕老人送嘅禮物，我仲會幫龍鳳胎打扮成聖誕老人。」
