早前佔領行動期間，大學生成為運動嘅骨幹，其中唔少仲企喺抗爭最前線，好似學聯秘書長周永康及常委梁麗幗，不過佢哋部分師兄師姊就似乎冇佢哋咁投入。話說早前好多大專院校畢業禮興起一股舉黃傘抗議風潮，引起唔少風波，令人以為個個學院畢業禮唔多唔少都會有人舉黃傘或戴黃絲帶。不過我哋聽聞，早前港大法律學院同醫學院舉行畢業禮，就出奇咁平靜，令人大跌眼鏡。

聽講法律學院連一把傘都冇，至於醫學院就有人舉咗一把雜色傘，上面寫上密麻麻嘅訴求，但係因為寫得太多太密反而睇唔清楚。咁啱醫學院既唔使扑頭，又唔使逐一頒發畢業證書，所以最終乜事都冇。唔知係咪有訴求嘅畢業生當時去晒佔領區，連畢業禮都唔去呢？

第一手消息請下載on.cc東網iPhone/iPad/Android/Windows Phone Apps