百物騰貴居不易 衣食住行樣樣難

咪話食飯唔知米貴，睇吓工聯會公布嘅「兩餸一湯指數」就一清二楚嘞。該會按三至四人家庭分量揀選七項食材做參考指標，包括菜心炒牛肉、梅菜蒸鯇魚及番茄薯仔瘦肉湯，結果發現今年有五項食材嘅平均價格較去年上升，當中以菜心升幅最大，由平均每斤十元八角升到十三元，升幅超過兩成，都咪話唔誇張。

街市方面，十八區街市之中，九個街市嘅食材價格較去年上漲，當中以大埔墟街市加幅最驚人，去年買兩餸一湯約一百零七元，今年就要畀多十三元。如果同四年前比較，升幅就更加唔講得笑，足足超過兩成八。正如該會發言人話齋，打工仔四年來嘅人工平均加幅只有一成九，遠遠追唔上食材升幅，基層市民想食餐飽飯都難，促請當局盡快落實最低工資一年一檢咁話。

話時話，家陣點止搵食艱難吖。社區組織協會最近訪問約三百名基層兒童，結果發現近六成兒童表示唔會買新衫，近五成聲稱每日會少食一餐嚟慳錢。未來社會棟樑竟然食唔飽、着唔暖，你話呢個社會唔係有病係乜吖！

冇計喇，香港出名有「三高」——地價高、樓價高、租金高，搞到成本高企，百物騰貴，基層市民愈窮愈見鬼。呢，淨係今年首十個月咋，私人樓價已經累升超過一成，十月住宅租金指數亦比九月上升百分之零點七，雙雙創下歷史新高。樓價租金係咁升，無殼蝸牛上樓難，天台屋、劏房唔遍地開花就奇喇。呢嗱，早前有外國記者訪問深水埗天台屋貧窮戶，報道一出舉世震驚，呢啲「隱形天台貧民窟」幾乎取代維港夜景，成為香港新地標。難為港府仲沾沾自喜，聲稱貧窮人口首次跌破百萬大關，證明扶貧政策有效喎，簡直不知民間疾苦。

講起就失禮咯，香港號稱國際大都會，又係世界有數嘅富裕城市，港府窮得只剩下錢，偏偏對解決貧富懸殊束手無策。更大鑊嘅係，反對派政客唯恐天下不亂，為反對而反對，搞到連扶貧政策亦受阻，遲遲未獲通過嘅低收入在職家庭津貼就係犧牲品。古人話，長安米貴，居大不易。香港都差唔多咋，市民無法安居樂業，社會想唔亂都難喇，叮！