城中鏡：歎世界釣大魚侯志強願交棒
好多人鍾意臨岸垂釣，亦有人喜歡一網打盡，上水鄉事委員會主席侯志強係識歎識玩之人，最近佢又有收穫，網獲八公斤重嘅鯪魚。
侯志強日前喺文錦渡網獲八公斤重鯪魚。（受訪者提供）
早前聲言想退出自由黨嘅侯志強，生活優哉悠哉，日前專程去到屬於邊境禁區嘅文錦渡，用魚網成功網獲逾八公斤重嘅鯪魚，當晚佢即刻同兄弟老友去「擦」餐勁。即將踏入新一年，鄉事派早已聚焦連串新界鄉村選舉，據聞，侯亦有意連任上水鄉委會主席，不過，佢解釋只係鄉紳推佢上轎，若果有賢能者接棒，佢一定樂意交棒喎。嘩，淡出政圈、仲連鄉事工作都想交棒，侯志強真係咁享受「半退休」嘅生活？
