民以食為天,金鐘政府總部有數以千計公務員返工,偏偏一一年到依家,都有食嘅難題。雖然換咗承辦商,但據聞唔少公務員都對飯堂質素有意見,有人仲不惜「轉戰」附近嘅連鎖快餐店,或改往立法會餐廳開飯,結果,行政署又要出動做民調,仲問得好徹底,睇嚟,署長蔡潔如今次真係出盡板斧,想解決一碗飯嘅問題。

設計圖片及對白

或者風水唔好

行政署最近喺飯堂外擺咗個收集箱,叫同事最遲喺尋日填寫問卷,或用內聯網交電子問卷。問卷內容主要係問食客對餐飲選擇、質素、食物味道濃淡係咪適中、用料係咪新鮮、烹調技術係咪穩定、分量係咪足夠等。又問及餐廳服務,好似餐牌指示夠唔夠、購票係咪方便、員工工作效率、衞生情況等,仲問餐廳喺十月上場後,幫襯咗幾多次,或未幫襯嘅原因。

我哋問過多名食客,有人就話早餐選擇唔夠多,如舊飯堂食開嘅番茄牛肉通粉,新飯堂冇供應;有人就話味道好淡,但又有人話好濃味,甚至有人話:「繼入口即溶嘅通粉、無奶油亦無烘過嘅奶油豬之後,最新力作係可以當做紙鎮嘅肉碎蒸水蛋!」亦有人話質素中規中矩。講開又講,政總飯堂兩個承辦商一開業都唔多好彩,一一年嗰次就面對退伍軍人症病毒,搞到要停業幾個月,生意跌咗一半,到今年九月約滿,仲續唔到約添。到新承辦商十月初接手,相信大家都知發生乜事,政總呢幾個月畀示威者佔領行動所累,搞到老闆失晒預算,唔通真係政總風水唔好?

第一手消息請下載on.cc東網iPhone/iPad/Android/Windows Phone Apps