中華廠商聯合會尋日請咗一班建制派議員去工展會參觀同購物，立法會議員鍾樹根就同埋太太出席。樹根話，雖然自己一向都唔會點買嘢，但每年都會陪太太行吓工展會，每次大約會用二千元買嘢。不過，樹根都投訴話，太太淨係煲湯畀個女同女婿飲，搞到佢都「呷醋」喎。

不過，鍾太前日喺尖沙咀星光大道表演唱歌，樹根本來答應撐場，仲話會幫手做攝影師添，點知到頭來樹根為咗去呂良偉生日會，竟然放飛機甩底，令鍾太大失所望，不過，鍾太都話明白樹根好忙，以後會煲多啲靚湯畀佢補身。佢兩公婆尋日表現恩愛，樹根全程傍實太太，一見到社企有賣飾物同髮夾，就即刻買咗五隻送畀太太。當太太話要佢改食健康穀麥片做早餐減肥，樹根就立即排隊買，認真聽話。

樹根黨友黃定光亦大手入貨，購買大袋鮑魚麵、麵包粉及健康食品，收穫多到大叫「無力挽」喇！

第一手消息請下載on.cc東網iPhone/iPad/Android/Windows Phone Apps