好多政界人士都會趁聖誕假期同親友歡度佳節,但唔少大專生仍忙於應付考試同交論文。本身係大學副教授嘅立法會議員陳家洛近日亦忙於改卷,希望之後抽多啲時間同啱啱喺波蘭返港嘅大女慶祝生日兼歡度聖誕。不過,有啲唔係咁聽話嘅學生就遲遲都未交論文,令到佢分分鐘要喺工作中過聖誕。

陳家洛(圖)尋日同家人為大女Monika慶祝十八歲生日。(互聯網圖片)

陳家洛大女Monika(圖右二)(互聯網圖片)

陳家洛大女Monika喺波蘭修讀政治及國際關係,日前返港度假,直至明年一月中。適逢尋日係Monika十八歲生日,一家五口可以齊齊慶祝,陳家洛話會同阿女切生日蛋糕,亦會送份小禮物,但最重要係叫佢登記做選民。

由於工作忙碌,陳家洛聖誕假期都唔會外遊,仲話一早叫咗啲學生交論文,唔好堆埋今晚先至交畀佢,可惜到依家都仲未收齊啲論文,令佢嘅聖誕假期危危乎,真係玩殘佢。無計啦,個個老師都話自己嗰科最重要,學生都唔知應該交邊份先,陳家洛惟有勤力啲改論文囉。

第一手消息請下載on.cc東網iPhone/iPad/Android/Windows Phone Apps