被譽為每周一鑊嘅周一嶽出任平機會主席後，該會工作表現就惹來多方批評，早前，繼最新一年表現報告被揭開支大咗、工作效率卻不佳後，平機會內部又爆出僱傭糾紛，前總平等機會主任束健銘疑因鼓勵教會人士去信平機會，反對性別歧視條例立法，即使喺平機會工作十八年，亦不獲續約，尋日佢前往勞工處勞資關係科投訴，雙方將於下月九日召開調停會議，呢個聖誕，周一鑊接連爆鑊，想安樂都難啦。

設計圖片及對白

單方面改合約 被斥「欺壓」

喺今次不獲續約事件之中，周一鑊擬將束健銘嘅八十多萬元約滿酬金化作「掩口費」，又要求對方簽署附帶多項不合理條款的協議書等，之後先至肯發放酬金。不滿呢種「不平待遇」嘅束健銘尋日告到勞工處，雙方定於下月九日召開調停會議，屆時周一鑊避都冇得避，雙方或要正面交鋒。

束健銘尋日話，平機會未有按合約發放約滿酬金，又要求佢簽署「不平等條約」，包括放棄追究平機會嘅權利、不可對外發放平機會嘅負面消息等，呢啲做法係單方面更改僱傭合約，「完全是欺壓」。平機會都有發聲明澄清，話已遵照人事管理制度及程序作出決定，又稱束健銘嘅指控與事實不符，該會政策是向滿意完成合約嘅員工發放約滿酬金。

陪同束健銘到勞工處嘅性傾向條例家校關注組召集人黃偉明就話，平機會係支持平等嘅組織，今次做法完全違反人權，並衝擊宗教自由，形容係一個「笑話」。

平機會本嚟係保障市民獲得平等機會嘅法定組織，點知依家爆出咁大單醜事，而且，涉事僱員被要求不得發放對機構負面嘅消息，梗係惹人疑竇啦！

第一手消息請下載on.cc東網iPhone/iPad/Android/Windows Phone Apps