港府帶頭虐老 港人點會敬老

嗱，只要搭車時細心留意吓，唔難發現好多後生仔「一坐不起」，個個淨係掛住滑手機，扮到乜都睇唔見，就算有老人家棟篤企喺佢面前都不為所動。雖然讓座係自願性質，但見微知著，一個讓座舉動，足以反映一個人嘅品格高低，甚至整個地區嘅人民質素。呢，前排網上先有一張熱傳相片，相中乘客拒絕向大肚婆讓座而備受指摘。所以話，香港人成日批評內地人冇文化冇教養，根本五十步笑百步咋。

香港人到底有幾敬老，不妨睇下關注團體調查結果吖。以一百分為滿分，結果今年嘅護老指標只有五十六點四分，啱啱合格咋。調查又發現，大部分受訪者唔明白長者嘅生活需要，半數受訪者認為無能力照顧長者，顯示市民嘅護老情感同行動有好大嘅差距。

講真，得出呢個調查結果其實冇乜出奇，事關香港人不嬲都係講求實際嘅動物，加上生活忙碌，好多人未必理解同關注長者嘅真正需要。正如關注團體話齋，香港人敬老往往姿勢大於實際，反映政府護老政策不到位，促請政府改善長者家居照顧服務咁話。

冇錯嘞，上樑不正下樑歪，港府帶頭立壞榜樣，市民點會唔係有樣學樣吖。講起就激氣咯，港府口口聲聲敬老護老，實際上得把口，安老政策天殘地缺，視老人家為包袱負累。淨係講政府資助長者宿位吖，由於數目嚴重不足，平均輪候時間長達三年，老人家隨時等到含恨而終。嗱，社署數字顯示，一○年前每年約有四千名長者喺輪候期間死亡，上年度已激增至近六千人，你話港府唔係虐老係乜吖？

話時話，當局近年確實推出唔少安老措施，一時「社區照顧服務券」，一時「護老者津貼」，一時「居家安老」，一時「北上安老」，名堂多多，花樣百出，可惜只為敷衍輿論，毫無成效。最離譜嘅係，香港人口老化迫在眉睫，社會對落實全民退保嘅呼聲日益高漲，當局偏偏借咗聾耳陳隻耳，乜都扮聽唔到。

即係咁，人人都會老，敬老其實係敬自己啫，如果高官唔想晚景淒涼，咁就要喺敬老方面做番啲實事嘞，叮！