城中鏡：榮智權報佳音率上商同事獻唱

有去開置地廣場嘅朋友近兩星期應該感覺到濃厚嘅聖誕氣氛，除咗見到啲不同造型熱氣球喺空中升降外，仲不時聽到唔同團體報佳音。前排行過就留意到一排冇見嘅上海商業銀行董事長榮智權同埋榮太Polly帶領一班銀行同事唱聖誕歌。

榮智權（前排左三）叫埋一班banker出嚟唱歌籌款，非常有心。

除咗上下一心做啲應節嘢，上商今次喺置地廣場唱聖誕歌主要係為咗幫「兒童發展配對基金」籌款，傳頌關愛青少年發展嘅訊息。

參與公益活動咁有意義嘅事除咗一班做細嘅要出席，一眾大banker都有積極響應，當日上商常務董事兼行政總裁David郭錫志、仲有加入無耐嘅產品拓展部主管Ricky陳志偉都有出嚟撐場，合共超過六十個員工，以平安夜一曲拉開籌款序幕，唱足半個鐘，吸引唔少途人駐足欣賞。

上商今年第二年幫手籌款，同事們都好踴躍報名參與，表演之前再難約齊人都排練咗五次，非常有心。