話咁快聽晚就係平安夜,唔少議員為咗唔同其他外遊市民撞到應一應,好多人提早兩日就搭飛機出發。不過個個走晒去玩,原定今日開會討論港珠澳大橋超支等議題嘅交通事務委員會,就因法定人數不足而要取消,激到委員會主席「田二少」田北辰紮紮跳。

田北辰(左)尋日落區表演魔術,同街坊提早過聖誕。(互聯網圖片)

田二少話唔少議員喺呢兩日相繼離港,佢都估到開會人數會比平時少一大截,但由於仲有議員講明放假唔會離開香港,所以佢決定照開會。但直至尋日朝早,佢再叫秘書逐個打電話畀議員,問佢哋今日可唔可以開到會,結果最後得五個人話得閒出席,有兩個就話唔知到唔到喎。但係就算七個人最後都嚟到,都仲差幾個先至夠法定人數,所以田二少就索性叫秘書處喺尋日下午宣布取消開會,將所有議程留番一月開會再傾過。

早前佔領行動及泛民議員發起不合作運動,令到議會運作受阻,依家又因為貪玩而開唔成會,到下次開會時已經堆積咗大量議程,田二少估計到時要開足四個鐘先可以處理得晒。

第一手消息請下載on.cc東網iPhone/iPad/Android/Windows Phone Apps