城中鏡：工業界撐頒獎學金妙計篩佔領生
雖然佔領行動已結束，但有個別機構向佔領學生所屬院校停止發放獎學金，引起社會爭議。香港青年工業家協會屬下基金會就力撐本地院校，基金會會長顏吳餘英認為唔能夠一竹篙打一船人，仲諗到好橋話若贊助人唔想向佔中學生發放獎學金，大可以設條款規定學生操行、出席率達標先可以獲發獎金，咁罷課參與佔中嘅學生自然「出局」啦！
嚴志明（右）接棒出任協會會長。左為黃灝玄。
左起：伍穎梅、唐偉章同潘潔現身捧場。
左起：楊志雄、吳宏斌同史立德力撐繼續向本地院校發放獎學金。
香港青年工業家協會早前舉行就職禮，由香港工業總會副會長Eric嚴志明接棒出任會長，好多工業界名人去捧場，包括香港電子業商會會長「耳機大王」楊志雄、中華廠商聯合會會董史立德、財經事務及庫務局常任秘書長黃灝玄、環境局前副局長潘潔同埋「九巴金公主」伍穎梅等人。
從小教育 杜絕佔領
講起停發獎學金話題，顏太話基金會每年都設獎學金資助本地院校學生及培育業界人才，所以唔會受到事件影響，將繼續支持教育。提升快樂指數基金主席吳宏斌亦認為，學生參與佔領唔可以入晒大學數，仲話教育應該從小做起，若唔喺小、中學加強學生正確觀念，貿然撤銷大學獎學金對阻嚇學生參與佔領未必有用。同場嘅理工大學校長唐偉章聽到，當然拍手歡迎兼趁機募捐喇！佢話理大全校共有三萬幾位學生，真正參與佔領嘅僅約二百人，比例唔夠百分之一，被捕人數更加只係個位數，佢認為若因個別學生違法而停發獎學金，對其他有需要嘅學生唔公平喎。
