尋日係農曆冬至，難得立法會呢一兩個星期休會，勞工及福利局局長張建宗就趁機抽咗一個早上，到東涌探訪勞工處轄下新投入運作嘅東涌就業中心，又分別同兩個地區組織代表及街坊交流，了解區內嘅民生同就業情況，探討點樣加強社區支援以釋放更多婦女勞動力。

張建宗冬至到東涌就業中心探訪。

張建宗呢日去到位於逸東邨嘅就業中心視察，除與勞工處同事交流點樣加強對區內唔同群組，包括少數族裔居民嘅度身服務外，又同離島婦聯主席周轉香等多位負責社區就業支援人員會面，討論點樣透過對地區婦女加強培訓、提供幼兒同課餘託管服務等，進一步令更多婦女可以得到就業機會。

佢仲去咗東涌社區發展陣線嘅會址，同多位老中青及主婦街坊會面逾一個半小時，聆聽佢哋喺就業同民生方面嘅關注，同佢哋分享政府政策方向同對低收入在職家庭嘅支援等等。

第一手消息請下載on.cc東網iPhone/iPad/Android/Windows Phone Apps