政壇：李小加總結今年 最成功瘦身兩磅
每個打工仔應該都好期待年尾，可以過節同放假，歎住迎接新一年嘅來臨。港交所總裁李小加亦都趁呢個時候，寫咗封信畀聖誕老人，總結吓今年嘅成績同預告港交所來年計劃，而佢今年最重要嘅成績就係成功瘦身兩磅。
李小加寫信話畀聖誕老人知，佢參加足球比賽而減咗兩磅好開心。（資料圖片）
唔好以為減肥單單係女士們嘅願望呀！喺信入面，佢分享咗自己成功減磅嘅喜悅。佢話自己好為食，所以靠參加足球比賽而減咗兩磅都好開心。佢又提到呢個月同深圳證券交易所嘅比賽，佢特別感謝隊長畀佢踢咗半場，雖然呢半場基本上連波都掂唔到，但佢依然為一比一嘅賽果感到自豪，當然最好係明年比賽畀佢入波，要不然喺佢嘅小夥伴面前不好意思喎。
睇完之後，覺得呢兩磅減得好抵，因為除咗喺運動方面出力之外，減磅期間李小加仲開通咗滬港通添！雖然依家成交量唔係好多，但都總算係順順利利。另外李小加話成功整合咗LME「商品翼」業務，例如搭建咗「東翼」廚房——香港交易所亞洲商品平台，以後會推出更多菜式。
除咗講自己戰績，李小加又表揚港交所職員為香港盡心盡力，仲話港交所嘅大家庭今年共有二十一位成員步入婚姻嘅殿堂，還有二十八位寶寶誕生，佢希望港交所每個人來年都健康快樂，工作順利喇！
