政壇：林凱章入紀常會 盼議員莫拉布
尋日政府公布公務員薪俸及服務條件常務委員會（薪常會）同紀律人員薪俸及服務條件常務委員會（紀常會）嘅委員名單，立法會議員林健鋒嘅兒子Victor林凱章同運輸及房屋局前常任秘書長何宣威齊齊成為紀常會新丁，任期由明年元旦開始，負責就紀律人員人工同服務條件向政府提供意見。何宣威同時獲委任為紀常會轄下警務人員小組委員會主席。警務處前處長李明逵就新加入薪常會做委員。
林凱章同何宣威同被委任入紀常會。（資料圖片）
何宣威（資料圖片）
Victor對委任覺得好榮幸，仲話會多啲聆聽唔同紀律部隊意見，同其他委員好好合作。咁紀常會有冇棘手任務需要解決？Victor笑而不答，話好敏感喎！咁佢爸爸林健鋒係咪好支持佢做公職？佢一樣避開唔肯答。
不過，佢強調希望立法會議員唔好郁吓就拉布，影響日後紀律部隊加人工嘅進度喇！唔知林健鋒會唔會幫手勸吓立法會同僚呢？
