政壇：圍政總失敗早料到 學聯送人去死?
常言道「水能載舟、亦能覆舟」，曾經係學生希望嘅學聯，喺佔領後期已經受到各方抨擊，聲稱勇猛嘅行動派更對學聯嘅溫和路線諸多不滿，最終十一月三十號學聯宣布升級包圍政總，但最後行動失敗，多名衝擊警方防線嘅示威者被警毆傷。
設計圖片及對白
學聯秘書長周永康昨日接受電視台訪問時自爆，原來當日決定包圍政總，係想畀一啲期望升級嘅人睇到，激進行為未必有用。點知呢句話惹起網民不滿，晚上周永康更因此而道歉。
澄清事後檢討 非事前計劃
佔領後期，即係大約十一月尾，佔領區內外出現極大分歧。當時佔領區外嘅市民認為學聯係時候撤退，但留守者就希望行動升級。結果當時學聯大膽決定將行動升級，並宣布包圍政府總部。周永康喺訪問入面話，學聯決定包圍政總，係想畀一啲「期望升級為主嘅人見到，呢種行動（包圍）未如理想。」佢甚至話，經過事件後發覺，一個社會運動需要多元化，「唔係一味升級作為主軸」。
呢個訪問中午出街後，隨即喺網上瘋傳，而且負評極多，唔少網民都話周永康咁講等同送班示威者去死，批評佢呢個講法極不負責任。有網民仲話，唔怪得之當日包圍政總無乜學聯成員啦，原來學聯一早打定輸數。
周永康似乎好緊張呢班網民意見，到昨日黃昏就喺個人社交網站澄清兼道歉，話喺訪問所講嘅嘢，只係從運動失敗當中吸取到嘅教訓同分析，學聯從無預先希望「升級失敗」，至於唔認同以行動升級作主軸，佢話呢個係事後檢討，唔係事前計劃。其實個世界好大，如果周永康只係緊張網上世界留言，而忽視其他人意見，都未必係好事。
