一時係神一時鬼 政客最叻係抽水
「何為邪鬼何為神，神鬼如何兩不分？」幾年前車公對香港嘅批語，講緊嘅咪就係班反對派政客囉。神係佢哋，鬼又係佢哋；明明收黑金搞搞震，偏要扮到為民請命咁款，認真惡頂。
係咁嘅，由於立法會拉布不止，搞到大量議案由上個立法年度拖到依家都未通過，其中一項就係公務員加薪嘞。職工盟下屬多個公務員同資助機構工會近日發表聯署聲明，要求港府調動立法會財委會議程，優先審議公務員加薪議案。有組織代表批評，對於加薪議案受其他爭議性議題影響，感到無奈；亦有組織代表話唔希望捲入政治漩渦，如果加薪一路拖落去，唔排除採取「工業行動」咁話。
嗱，公務員加薪受阻撓，情況的確令人同情。之不過咁，要求優先處理公務員加薪，未必能得到公眾支持o架。原因好簡單，受立法會拉布影響，七百萬市民都係受害者，基層受影響最大，即使要調動議程，都係要照顧基層先，公務員團體一向畀人先天下之樂而樂嘅印象，冇理由次次都係咁，係咪？
再講喇，冤有頭，債有主，公務員遲遲加唔到薪，罪魁禍首係邊個？咪就係班反對派政客囉，而職工盟阿頭李卓人就係其中之一嘞。公務員要示威也好，採取工業行動都好，不如先搵李卓人等人算帳喇，只要佢哋唔再拉布，唔再阻住地球轉，加薪議案咪話咁易就通過囉。
講真，公僕加薪拖到幾時都好，都有追溯期。反觀貧困家庭捉襟見肘，低津推遲發放意味住繼續捱窮。仲有喎，不少基建被拖，無殼蝸牛上樓夢愈嚟愈遙遠。所以話啫，政客拉布對達官貴人無影響，受害嘅都係無辜市民咋。
話時話，拉布激起天怒人怨，反對派政客冇理由唔知，點解仍要一意孤行？鬼咩，佢哋不過係外部勢力同淫賤黎豢養嘅走狗傀儡，點到自己話事吖。好似李卓人咁，幕後金主除咗淫賤黎，仲有山姆大叔添，主子要佢哋繼續搞搞震，佢哋點可以停止全面不合作行動吖。更何況，香港愈亂，民怨愈大，主子打賞愈勁，啲政客仲唔去到盡咩。
最可憐係班被政客蒙蔽同靠害嘅打工仔，阿頭外國護照在手，隨時腳底抹油，就算香港玩完，佢哋照樣關人個關。太一叮都係嗰句，呢班政客信佢半成，雙目失明喇，叮！
